19.12.2013

Mikil fjölgun gesta í Víkingaheima

Horft yfir víkingaskipið frá efri hæð Víkingaheima

Þann 5. október árið 2000 sigldi víkingaskipið Íslendingur inn til hafnar í New York, til staðfestingar á landafundum Íslendingsins Leifs Eiríkssonar heppna, þúsund árum áður. Skipið sjálft, saga þess og fyrstu landnámsmannanna má nú sjá í glæsilegri aðstöðu fyrir ferðamenn í Víkingaheimum í Reykjanesbæ, ásamt fleiri tengdum sýningum. 

Að sögn Valgerðar Guðmundsdóttur, menningarfulltrúa hjá Reykjanesbæ, sem sinnir framkvæmdastjórn Víkingaheima hafa þær fimm sýningar sem nú eru í húsinu fengið mikið lof ferðamanna og kynningarfyrirtækja.  Á síðustu tveimur árum hafa þrjár nýjar sýningar verið settar í húsið þær tvær sem fyrir voru, endurnýjaðar og yfirfarnar.  Í lok september 2013 voru gestir orðinir 18.967 og er áætlað að þeir verði um 20.000 í árslok. Heildargestafjöldi árið 2012 var 13.280 og hefur því orðið veruleg fjölgun á milli ára. Árið 2011 var heildargestafjöldinn 8.474 svo sjá má að gestum í Víkingaheima fjölgar jafnt og þétt.

Sýningarnar fimm eru eftirfarandi: 

  • Víkingaskipið Íslendingur er nú sem fyrr stærsti sýningargripurinn, en við innganginn í skipið hefur verið komið fyrir upplýsingum um siglingu Íslendings til Vesturheims árið 2000. 
  • Hluti úr Smithsonian sýningunni „Víkingar Norður Atlantshafsins“, sem sett var upp víða í Bandaríkjunum árið 2000, prýðir nú neðri hæð hússins. 
  • Sett hefur verið upp sýningin  Sagnaslóðir á Íslandi  á efri hæð þar sem allar helstu sagnaslóðir á landinu eru nú kynntar í myndefni og texta á fjórum tungumálum.  Sú sýning er unnin í samstarfi við Samtök um sögutengda ferðaþjónustu. 
  • Byggðasafn Reykjanesbæjar stendur fyrir vandaðri sýningu á fornminjum á Suðurnesjum, studda af rannsóknargögnum frá Höfnum. Sýningin var sett upp í sal við innganginn á neðri hæðinni.   
  • Þá setti Listasafn Reykjanesbæjar upp listræna sýningu á norrænni goðafræði "Örlög guðanna" á efri hæð hússins þar sem gestir upplifa norrænu guðina með aðstoð myndlistar, tónlistar og hljóðleiðsagnar á fjórum tungumálum.